സൈന്യത്തോടുള്ള അമിത പ്രതിപത്തിയും വീരാരാധനയുമാണല്ലോ ഇന്നൊരു സാധാരണ ഇന്ത്യക്കാരന്റെ ദേശസ്നേഹം അളക്കാനുള്ള മിനിമം സ്കെയിൽ. സൈനികരുടെ സേവനത്തേയും ത്യാഗത്തേയും കുറിച്ച് ആവേശം കൊള്ളുകയും നമ്മുടെയൊക്കെ ജീവിതം സൈനികരുടെ ഔദാര്യമാണെന്നും പട്ടാളക്കാർ കഷ്ടപ്പെടുമ്പോൾ മറ്റുള്ളവർക്ക് സുഖ സൗകര്യങ്ങൾ അനുഭവിക്കാൻ അവകാശമില്ലെന്ന് ഉദ്ബോധിപ്പിക്കുകയും ചെയ്യുന്ന ദേശസ്നേഹത്തിന്റെ കുത്തകാവകാശികളെന്ന് സ്വയം പ്രഖ്യാപിച്ചിട്ടുള്ള ഭരണകൂട വക്താക്കളോട് ചില ചോദ്യങ്ങൾ ചോദിക്കേണ്ടതുണ്ട്.

കഴിഞ്ഞ മൂന്നു വർഷം സൈനികരുടെ ക്ഷേമത്തിനും സുരക്ഷക്കും വേണ്ടി എന്താണ് ഇന്ത്യാ ഗവർമെന്റ് ചെയ്തത്? മറ്റൊരു കാലത്തുമില്ലാത്തത്ര ആക്രമണങ്ങളും ആൾനാശവും ഇന്ത്യൻ സേന നേരിടുന്ന സങ്കീർണ അവസ്ഥ പരിഹരിക്കുന്നതിന് എന്ത് നടപടിയാണ് സ്വീകരിച്ചിട്ടുള്ളത്? ഒന്നുമില്ല എന്നതാണ് വാസ്തവം. വർഷങ്ങളായി സർക്കാരിന്റെ പരിഗണനക്ക് സമർപ്പിക്കപ്പെട്ടിട്ടുള്ള ആധുനികവൽക്കരണ നിർദ്ദേശങ്ങളൊന്നും തന്നെ ദേശ സ്നേഹികളുടെ സ്വന്തം ഗവർമെന്റും ഇതു വരെ ഗൗരവമായി കണ്ടിട്ടില്ല. കേവലം 28,000 രൂപ വിലയുള്ള ബുള്ളറ്റ് പ്രൂഫ് ജാക്കറ്റുകൾ വിതരണം ചെയ്യാനുള്ള നിർദ്ദേശം പോലും ഇതുവരെ നടപ്പിലാക്കപ്പെട്ടിട്ടില്ല എന്നറിയുമ്പോഴാണ് സൈനികരോട് നമ്മുടെ ഗവർമെൻറിനുള്ള സ്നേഹവും പ്രതിബദ്ധതയും ബോധ്യമാവുക.

ഇന്ത്യൻ സർക്കാരിന് പട്ടാള സ്നേഹം ഒരു തന്ത്രം മാത്രമാണ്. അതിർത്തിയിൽ ട്രഞ്ച് കുഴിച്ച് മനുഷ്യത്വ വിരുദ്ധമായ സാഹചര്യങ്ങളിൽ ഒളിച്ചിരിക്കുകയും തോക്കും പിടിച്ച് കവാത്തു നടത്തുകയും ചെയ്യുന്ന സേന വികസിത സമൂഹങ്ങളിൽ ഒരു പക്ഷേ ഇന്ത്യയിൽ മാത്രമേ ഇപ്പോഴുള്ളൂ. അതിർത്തികൾ കമ്പ്യൂട്ടർവൽക്കരിക്കാനോ ഏകീകൃത നിയന്ത്രണ സംവിധാനത്തിൻ കീഴിൽ കൊണ്ടു വരാനോ ഉള്ള ഒരു നീക്കവും ഗവർമെന്റിന്റെ ഭാഗത്തു നിന്നുമുണ്ടാവുന്നില്ല. പ്രശ്നങ്ങളുള്ള പാകിസ്ഥാൻ അതിർത്തി മുഴുവനും ഉപഗ്രഹ നിരീക്ഷണത്തിലാക്കാനും അതിർത്തി ലംഘനങ്ങളെ നേരിടാൻ വിദൂര നിയന്ത്രിത സംവിധാനങ്ങൾ ഏർപ്പെടുത്താനും വേണ്ടിവരുന്നതിനേക്കാൾ എത്രയോ മടങ്ങ് തുകയാണ് ഒരിക്കലും ഉപയോഗിക്കാൻ ഇടയില്ലാത്ത വെടിക്കോപ്പുകൾ വാങ്ങാൻ ചെലവഴിക്കുന്നത്. സിയാച്ചിനിലെ – 50 ഡിഗ്രി തണുപ്പിൽ കാവൽ നിൽക്കുക മനുഷ്യ സാധ്യമല്ല എന്നറിഞ്ഞിട്ടും അവിടെ മനുഷ്യരെ തന്നെ ജോലി ചെയ്യിക്കണമെന്ന് ആർക്കാണ് നിർബന്ധം. താഴെയിരുന്ന് നിയന്ത്രിക്കാവുന്ന ഏതാനും ചില റോബോട്ടുകൾക്ക് നിർവഹിക്കാൻ കഴിയുന്നതേയുള്ളൂ മനുഷ്യ വാസമില്ലാത്ത ആ അതി ശീത മേഖലയിലെ ഉത്തരവാദിത്തങ്ങൾ.

നിരന്തരം ആഭ്യന്തര പ്രശ്നങ്ങൾ നേരിടുന്ന രാജ്യങ്ങളെ മാറ്റിനിർത്തിയാൽ നമ്മളീ പറയുന്ന വീരമൃത്യു വേറൊരു രാജ്യത്തുമില്ല എന്നതാണ് സത്യം. സമാധാന കാലത്ത് പട്ടാളക്കാരൻ കൊല്ലപ്പെടുന്നത് കേട്ടുകേൾവി മാത്രമാണ് മിക്ക രാജ്യങ്ങളിലും. ഇന്ത്യ നേരിടുന്നതിനേക്കാൾ ഗുരുതരമായി ബാഹ്യശകതികളുടെ ആക്രമണ ഭീഷണി നേരിടുന്ന രാജ്യങ്ങളിൽ എന്തു കൊണ്ടാണ് സൈനികരുടേയും സിവിലിയൻമാരുടേയും മരണസംഖ്യ കുറഞ്ഞിരിക്കുന്നത് എന്നതിന് ഒരുത്തരമേയുള്ളു. അവിടങ്ങളിലൊക്കെ സൈന്യത്തിന്റെ ആധുനികവൽക്കരണം എന്നത് കേവലം ആയുധങ്ങൾ വാങ്ങിക്കൂട്ടലല്ല, ഓരോ സൈനികന്റേയും ജീവന് സാധ്യമായ പരമാവധി സുരക്ഷ ഉറപ്പുവരുത്തുക എന്നു കൂടിയാണ്.

ഇന്ത്യൻ കരസേന അതിന്റെ ആധുനികവൽകരണം സംബന്ധിച്ച വ്യക്തമായ കാഴ്ചപ്പാടുകൾ സഹിതം 2027 ൽ പൂർത്തിയാവുന്ന വിധത്തിൽ ഒരു പദ്ധതി ആവിഷ്കരിച്ച് ഗവര്‍മെന്റിന് സമര്‍പ്പിച്ചിട്ട് ഏറെ കാലമായി. ഇതിൽ കാലാൾപടയുടെ സുരക്ഷക്കായി ഡിജിറ്റൽ ഹെൽമെറ്റും ഇലക്ട്രോണിക് കണ്ണുകളും ബുള്ളറ്റ് പ്രൂഫും ഉൾപ്പെടെ നിരവധി നിർദ്ദേശങ്ങളുണ്ടെങ്കിലും ഒന്നു പോലും ഇതുവരെ നടപ്പായിട്ടില്ല – എന്നു മാത്രമല്ല 2015-16 വർഷത്തിൽ പദ്ധതിക്കായി നീക്കി വച്ച തുക വെട്ടിക്കുറക്കുകയുമുണ്ടായി. കാര്യം ഇത്രയേയുള്ളൂ.. കൊല്ലപ്പെടുന്ന ഓരോ പട്ടാളക്കാരനും പ്രകടനോന്മുഖമായ അമിത ദേശീയതയുടേയും കപട ദേശ സ്നേഹത്തിന്റേയും ബലിയാടുകളാണ്. അവരുടെ മരണം ഭരണകൂടവും അതിന്റെ സിൽബന്തികളും സ്വാർഥ താൽപര്യങ്ങൾക്കു വേണ്ടി ദുരുപയോഗിക്കുകയാണ്.

ദേശസ്നേഹം വിജ്യംഭിച്ചിട്ടൊന്നുമല്ല ഇവിടുത്തെ ചെറുപ്പക്കാർ പട്ടാളത്തിൽ ചേരുന്നത്. ഒരു തൊഴിൽ എന്ന നിലയിൽ തന്നെയാണ് ഭൂരിഭാഗം പേരും സൈനിക സേവനത്തിനിറങ്ങുന്നത്. അതിനാൽ തന്നെ അവർക്കാവശ്യമായ സുരക്ഷാ സംവിധാനങ്ങൾ ഒരുക്കാൻ സർക്കാർ ബാധ്യസ്ഥമാണ്. പട്ടാളക്കാരന്റെ മരണവും ഒരു പാടു ജീവിതങ്ങളെ അനാഥമാക്കുന്നുണ്ട്. വീരമൃത്യു എന്ന വ്യാജ ലേബലൊട്ടിച്ച് അതിൻമേൽ മുതലക്കണ്ണീരൊഴുക്കലല്ല യഥാർഥത്തിൽ സൈനികരെ ബഹുമാനിക്കുന്ന ഒരു ഭരണകൂടം ചെയ്യേണ്ടത്. മരണത്തെ ആഘോഷമാക്കി അതിൽ നിന്ന് മുതലെടുപ്പ് നടത്തലല്ല ഒരു ദേശീയ സർക്കാരിന്റെ ദൗത്യം. ഓരോ സൈനികന്റേയും ജീവൻ അമൂല്യമാണെന്ന് ബോധ്യപ്പെടുകയും സംരക്ഷിക്കുകയും ചെയ്യലാണ്. ഓരോ ദിവസവും വീരമൃത്യുവിന്റെ വാർത്തകൾ കേട്ട് കോരിത്തരിക്കുന്നതല്ല ദേശ സ്നേഹം, മറിച്ച് ചോര മണക്കുന്ന വാർത്തകൾ ഇല്ലാതെയാക്കലാണ് ദേശസ്നേഹത്തിന്റെ ഉദാത്ത ഭാവം.

3 Comments
  1. Peter 3 years ago

    Correctly said… The treatment for our armed forces must change, especially for the lower ranking personnel.

  2. Haridasan 3 years ago

    Yes, our military personnel deserves a better life. Use technologies to reduce casualities. Thanks for the insights…

  3. Hari Krishnan 1 year ago

    തെറ്റായ കുറെ വസ്തുതകളുമായി രാഷ്‌ടീയ നേട്ടത്തിന് വേണ്ടി എഴുതിയ ലേഖനം അനവസരത്തിലായി എന്ന് പറയാതെ വയ്യ.

    നമ്മുടെ ഒക്കെ ജീവിതം ഒരു കണക്കിന് സൈന്യത്തിന്റെ കൂടി ഔദാര്യമാണ്. സൈന്യത്തിന്റെ മാത്രമല്ല നീതി ന്യായ വ്യവസ്ഥിതിയുടെ കൂടി ഔദാര്യമാണ്. നമ്മുടെ നീതി ന്യായ വ്യവസ്ഥ നില നിർത്തുന്നതിൽ പോലീസിനും കോടതിയ്ക്കും പട്ടാളത്തിനും ഒക്കെ പങ്കുണ്ട്. ഇതൊന്നുമില്ല എങ്കിൽ ചില ആഫ്രിക്കൻ രാജ്യങ്ങളെ പോലെ അരാജകത്വവും അരക്ഷിതാവസ്ഥയും ആവും ഫലം.ഇന്ത്യയുടെ നില നിൽപ്പിനു സൈന്യത്തിന്റെ ശക്തി ഒരു പ്രധാന ഘടകം തന്നെ ആണ്. അത് പറയുന്നത് തെറ്റാണു എന്ന ധ്വനി താങ്കളുടെ വാക്കുകളിൽ ഉണ്ട്. രാജ്യ സ്നേഹത്തെ കുറിച്ച് ആര് പറഞ്ഞാലും അതിൽ തെറ്റില്ല. പിന്നെ രാജ്യം വെട്ടി മുറിച്ചു പല കക്ഷണങ്ങൾ ആക്കാൻ ആഗ്രഹിച്ചവരും ചില രാജ്യങ്ങൾ ഇന്ത്യയെ യുദ്ധത്തിൽ തോൽപിക്കണം എന്ന് ആഗ്രഹിച്ചു നമ്മുടെ പട്ടാളക്കാർക്ക് രക്തം കൊടുക്കാൻ വരെ വിസമ്മതിച്ചവരും ഇന്ത്യ എന്ന വികാരം വളർന്നാൽ തങ്ങളുടെ വോട്ടു കുറയും എന്ന് പേടിക്കുന്നവരും ചിലപ്പോൾ ഇന്ത്യ എന്ന വികാരത്തെ തള്ളി പറഞ്ഞു എന്നിരിക്കും. അത് അവരുടെ വയറ്റുപിഴപ്പിനു വേണ്ടി ഉള്ള നിലവിളി ആണ് എന്ന് കരുതിയാൽ മതി. ഇപ്പോൾ വന്നു വന്നു ഇന്ത്യ, ദേശീയത എന്നൊക്കെ പറയുന്നത് എന്തോ മഹാ അപരാധം ആണ് എന്ന രീതി ആയി പോയി..

    2006 ലാണ് എന്ന് തോന്നുന്നു മിലിട്ടറിയുടെ ആധുനിക വത്കരണത്തിന്റെ പരിപാടികൾ തുടങ്ങുന്നത്. അതിനു ശേഷം 2014 വരെ ആ കാര്യത്തിൽ കാര്യമായ ഒരു പുരോഗതിയും ഉണ്ടായില്ല. 1,86,168 ബുള്ളറ്റ് പ്രൂഫ് ജാക്കറ്റു ആണ് 2007- 2012 കാലയളവിൽ ആർമിക്കു കിട്ടേണ്ടിയിരുന്നത്. 2014 ൽ പോലും അത് ഒന്ന് പോലും കിട്ടിയില്ല. അന്നത്തെ സർക്കാരുകൾ എന്താണ് ചെയ്തിരുന്നത് എന്ന് ചോദിക്കാതെ ഇപ്പോഴത്തെ സർക്കാരിനെ അതിനും കുറ്റപെടുത്തുന്ന ലേഖകന്റെ മഹാമനസ്കത കൊള്ളാം. [ഇനി മൻ മോഹൻ സിങ് ഒക്കെ ബിജെപി ആണ് എന്നാണോ ആവോ കരുതി ഇരിക്കുന്നത്!!!]. ഇതിന്റെ കുറവ് കണ്ടാണ് 2016 ൽ ഏതാണ്ട് 50000 ജാക്കറ്റ് സർക്കാർ മേടിച്ചതു. 2014 വരെ ഈ കാര്യത്തിൽ ഒരു പുരോഗതിയും ഉണ്ടായില്ല എന്ന് മാത്രമല്ല വേണ്ട ജാക്കറ്റ് ഏതാണ് എന്ന് പോലും കണ്ടെത്തിയിരുന്നില്ല. എന്തായാലും ഈ സർക്കാരാണ് രണ്ടു ലക്ഷത്തോളം ബുള്ളറ്റ് പ്രൂഫ് ജാക്കറ്റ്കൾക്ക് ഓർഡർ കൊടുത്ത്തു. [ഇംഗ്ലീഷ് ദേശാഭിമാനിയായ NDTV യുടെയും ഹിന്ദുവിന്റെയും വാർത്ത ഒന്ന് വായിച്ചിരുന്നു എങ്കിൽ ഈ തെറ്റുകൾ എഴുതില്ലായിരുന്നു. – NDTV യുടെ ഹെഡിങ് തന്നെ 9 കൊല്ലത്തെ കാത്തിരിപ്പിനു ശേഷം സൈന്യത്തിന് ബുള്ളറ്റ് പ്രൂഫ് ജാക്കറ്റ് കിട്ടുന്നു എന്നാണ്. – https://www.ndtv.com/india-news/after-9-year-wait-indian-soldiers-to-finally-get-bulletproof-jackets-1834945%5D. മൂന്നു കൊല്ലത്തിനു ഉള്ളിൽ ഇവ വിതരണം ചെയ്യും എന്ന് തോന്നുന്നു. [റെഡി മേഡ് ഷർട്ട്‌ പോലെ ഇത് മേടിക്കാൻ കിട്ടില്ലല്ലോ. ഉണ്ടാക്കി കിട്ടാൻ സമയം എടുക്കും]

    കേവലം 28000 രൂപ വില എനൊക്കെ പറഞ്ഞു ചെറുതാക്കരുത്. ഇപ്പോൾ കൊടുത്തിരിക്കുന്ന ഓർഡർ തന്നെ ഏതാണ്ട് 1000 കോടിയുടെ ആണ്. ഏതാണ്ട് 12 ലക്ഷം സൈനികർക്കു മനോജ് പറഞ്ഞ വിലയ്ക്ക് തന്നെ ഇത് കിട്ടാൻ ഏതാണ്ട് 3500 കോടി വേണ്ടി വരും. അതത്ര നിസ്സാരമല്ല.

    ഇത് വരെ ഉള്ള സർക്കാരുകളെ അപേക്ഷിച്ചു ഈ സർക്കാരാണ് ഏറ്റവും കൂടുതൽ സൈന്യത്തിന്റെ ആധുനിക വത്കരണത്തിനു നടപടികൾ തുടങ്ങിയത്. ആർമിക്കു മാത്രമല്ല എയർ ഫോഴ്‌സിനും നേവിക്കും ഒക്കെ അതിന്റെ ഗുണ ഫലങ്ങൾ കിട്ടിയിട്ടുണ്ട്. ഇത്രയും കാലത്തേ സർക്കാരുകൾ എന്താണ് ചെയ്തിരുന്നത് എന്ന് ഇപ്പോൾ തോന്നി പോകും. ഒരു കണക്കിന് അതൊക്കെ നന്നായി എന്ന് തോന്നുന്നു. നമ്മുടെ രാജ്യത്തിന് കുറെ പണം ലാഭം കിട്ടി അത് കൊണ്ട്. അല്ലെങ്കിൽ ഓരോ ഡീലിലും എത്ര രൂപ കമ്മീഷൻ ആയി പോയേനെ. നമ്മുടെ റാഫേൽ തന്നെ ഉദാഹരണം. 2007 ലെക്കാൾ 2016 ൽ 27000 കോടി ലാഭിച്ചു. ഏതൊരു സാധനവും കാലം കഴിയുമ്പോൾ വില കൂടും. അപ്പോൾ അന്നതേക്കാൾ ഒരു 20000 കോടി എങ്കിലും കൂടി കാണും. അപ്പോൾ ചുരുങ്ങിയത് ഒരു 40000 കോടി കമ്മീഷൻ പോകാതെ ഇന്ത്യക്കു ലാഭമായല്ലോ.

    ഏതാണ്ട് 36 യുദ്ധ കപ്പലുകൾ ആണ് ഇപ്പോൾ പണിതു കൊണ്ടിരിക്കുന്നത്. കൂടുതൽ യുദ്ധ കപ്പലുകൾക്ക് ഉള്ള അനുമതി ഈ സർക്കാർ കൊടുത്തു കഴിഞ്ഞു. അത് പോലെ പുതിയ ഹെലികോപ്റ്ററുകളും, മുങ്ങി കപ്പലുകൾക്കും അനുമതി കൊടുത്തു. ഇതൊക്കെ നിർമിച്ചു കിട്ടണം എങ്കിൽ സമയം എടുക്കും. ഇപ്പോൾ അനുമതി കൊടുത്തിട്ടുള്ള പല പ്രൊജെക്ടുകളും 2020 ഓടെ ആണ് പൂർത്തിയാവുക. കാറോ ബൈക്കോ മേടിക്കുന്നത് പോലെ കപ്പലും വിമാനവും ഒന്നും കിട്ടില്ലലോ. അപ്പോഴാണ് കഴിഞ്ഞ സർക്കാരുകളുടെ പിടിപ്പു കേടുകൾ കൊണ്ട് ഇന്ത്യയുടെ ഡിഫെൻസ് സെക്ടർ എത്ര മാത്രം പുറകോട്ടു പോയി എന്ന് മനസ്സിലാവുക.

    പക്ഷെ ഇതൊന്നും പോരാ എന്നത് വസ്തുത തന്നെ ആണ്. ഇനിയും ടെക്നോളജി ഈ രംഗത്തേക്ക് വരണം. അത് ജവാന്മാരുടെ ജീവിതത്തെ കൂടുതൽ രക്ഷിക്കണം. ഈ സർക്കാർ ഇനിയും ഈ രംഗത്ത് പ്രവർത്തിക്കണം എന്ന് തന്നെ ആണ് ആവശ്യം. . പക്ഷെ എല്ലാം ഒറ്റ ദിവസം കൊണ്ട് ആവില്ലലോ.. ഇത് നല്ല തുടക്കം ആവട്ടെ എന്ന് പ്രതീക്ഷിക്കാം. ഇവിടെ പ്രശ്നം ഇത് വരെ ഉള്ള സർക്കാരുകൾ എന്ത് ചെയ്തു എന്നതും ഈ സർക്കാർ ഇ കാര്യത്തിൽ എന്ത് ചെയ്തു എന്നും ആണ്. ആ കാര്യത്തിൽ ഈ സർക്കാർ മുന്നിൽ ആണ് എന്ന് തന്നെ ആണ് റിപോർട്ടുകൾ പറയുന്നത്.

    ഇവിടെ ഇപ്പോൾ യുദ്ധമില്ല എന്ന് പറയുന്നതിൽ കാര്യമില്ല. ഒരു വശത്തു മത തീവ്രവാദികളായും വേറെ ഒരു വശത്തു ഇടതു മാവോ തീവ്രവാദികളും ആയി നമ്മൾ യുദ്ധത്തിൽ തന്നെ ആണ്. നമ്മുടെ പട്ടാളക്കാർ വെറുതെ ഇരിയ്ക്കുമ്പോൾ മരിക്കുന്നതല്ല. മിക്കവാറും മിലിറ്ററി ഓപ്പറേഷനിലോ അതുമായി ബന്ധപ്പെട്ട ആണ് അപകടങ്ങൾ സംഭവിക്കുന്നത്. അത് ആർമിയുടെ കഴിവ് കേടു കൊണ്ട് ഒന്നുമല്ല.ഒരു യുദ്ധത്തിൽ രണ്ടു വശത്തും നാശ നഷ്ടങ്ങൾ ഉണ്ടാവും. അത് പോലെ മറ്റു രാജ്യങ്ങളിൽ തീവ്ര വധ ആക്രമണങ്ങൾ കുറഞ്ഞത് ശക്തമായാ നിലപാടുകൾ ആ രാജ്യങ്ങൾ സ്വീകരിച്ചത് കൊണ്ടാണ്. ഇവിടെ പട്ടാളക്കാരെ കല്ലെറിയുന്നതിനെ സപ്പോർട്ട് ചെയ്യുന്ന രാഷ്‌ടീയക്കാർ ആണ് ഉള്ളത്. പിന്നെ പട്ടാളക്കാർ ബലാത്സംഗം ചെയ്യുന്നു എന്നൊക്കെ പറയുന്നവരും. മറ്റു രാജ്യങ്ങളിൽ രാജ്യ സുരക്ഷയുടെ കാര്യത്തിൽ എല്ലാവരും ഒറ്റക്കെട്ടാണ്. ഇവിടെ അങ്ങനെ അല്ല. നമ്മുടെ നാടിൻറെ സുരക്ഷയെ ബാധിക്കുന്ന ആളുകളെ പുറത്താക്കാൻ സർക്കാർ ശ്രമിക്കുമ്പോൾ അതിനെ മനുഷ്യാവകാശം പറഞ്ഞു പിന്തിരിപ്പിക്കുന്നവരുടെ നാടാണ് ഇത്. ആദ്യം രാജ്യത്തിന് വില ഇവിടെ ഉള്ളവർ കാണണം. അല്ലാതെ രാഷ്‌ടീയം നോക്കി സത്യത്തെ മൂടി വച്ച് മുന്നോട്ടു പോയിട്ട് സർക്കാർ ഒന്നും ചെയ്യുന്നില്ല എന്ന് വിലപിച്ചിട്ടു കാര്യമില്ല.

    ലോകത്തിൽ എവിടെയും പ്രശ്ന ബാധിത അതിർത്തിയിൽ പൂർണ്ണമായും ആളുകളെ മാറ്റി ടെക്നോളജി കൊണ്ട് പ്രതിരോധം തീർക്കാൻ പറ്റിയിട്ടില്ല. അതിനുള്ള ശ്രമങ്ങൾ ഇന്ത്യയിലും നടക്കുന്നുണ്ട്. പക്ഷെ അതിനുള്ള ടെക്നോളജി ഇത് വരെ കണ്ടെത്തിയിട്ടില്ല.പറയുമ്പോൾ എല്ലാം എളുപ്പമാണ്. ഒരു അതിർത്തി രക്ഷ ഓട്ടോമേഷൻ സിസ്റ്റം നെറ്റ് വർകഡ് ആവും. അപ്പോൾ അതിൽ ഹാക്ക് ചെയ്യാൻ സാധിക്കും. അങ്ങനെ വന്നാൽ അത് നമ്മുടെ സുരക്ഷയെ ബാധിക്കും. എങ്കിലും റഡാര്, ലേസർ തുടങ്ങിയ ടെക്നോളജികൾ ഉപയോഗിച്ച് കൊണ്ടുള്ള സുരക്ഷാ വേലികൾ ഇന്ത്യ നിർമിച്ചിട്ടുണ്ട്. അത് പരീക്ഷണ അടിസ്ഥാനത്തിൽ ആണ്. പരീക്ഷണങ്ങൾ വിജയിച്ചാൽ ആർമി തന്നെ അത് .വരുത്തും.

    സിയാച്ചിൻ തന്ത്ര പ്രധാന സ്ഥലമാണ്. അത്രയും തണുപ്പിൽ പ്രവർത്തിക്കും എന്ന് ഉറപ്പുള്ള റോബോട്ടുകൾ ഇപ്പോൾ എവിടെ ആണ് നിലവിൽ ഉള്ളത് എന്ന് ലേഖകൻ ഒന്ന് പറഞ്ഞാൽ നന്നായിരുന്നു. ഇന്ത്യൻ ആർമിക്കും അവരുടെ ആളുകളെ ബുദ്ധിമുട്ടിച്ചു അവിടെ നിർത്തണം എന്നില്ല . ഒരിക്കൽ പാകിസ്ഥാൻ കൈയേറാൻ തുടങ്ങിയപ്പോൾ അത് സംരക്ഷിക്കാൻ ആണ് നമ്മുടെ ആർമി അവിടെ പോയത്. വാക്കിന് വിലയില്ലാത്ത, മത ഭ്രാന്ത് മൂത്ത ഒരു അയൽക്കാരൻ നമ്മുടെ അടുത്തുള്ളപ്പോൾ നമ്മുടെ തന്ത്ര പ്രധാന സ്ഥലാം സംരക്ഷിക്കേണ്ട ഉത്തരവാദിത്വം അവർക്കുണ്ട്. നാളെ സിയാച്ചിനിൽ ആർമി ഇല്ലാതെ ഇരുന്നു അവിടെ ചൈനയോ പാകിസ്ഥാനോ കൈയേറിയാൽ ഈ പറയുന്നവർ തന്നെ സർക്കാരിനെ വിമർശിക്കാൻ ചാടി ഇറങ്ങും. ഇപ്പോൾ നിലവിൽ ഉള്ള ടെക്നോളജി വച്ച് ഉള്ള കാര്യങ്ങൾ അവിടെ ചെയ്യുന്നുണ്ട്. 24 മണിക്കൂറും പ്രവർത്തിക്കുന്ന തണുപ്പ് ബാധിക്കാത്ത റോബോട്ടുകൾ [AI മൂലം വർക്ക് ചെയ്യുന്ന] വന്നാൽ ചിലപ്പോൾ നമ്മുടെ ആർമിയുടെ സ്ട്രെങ്ത് അവിടെ കുറച്ചേക്കും. പക്ഷെ അത് സംഭവിക്കാൻ സംഭവിക്കാൻ കാലങ്ങൾ എടുക്കും

    എന്തായാലും ഏറ്റവും കൂടുതൽ മിലിറ്ററിയുടെ ആധുനിക വത്കരണത്തിനു വേണ്ടി പ്രവർത്തിച്ച ഒരു സർക്കാരിനെ [ഇനിയും പല കാര്യങ്ങളിലും ചെയ്യാനുണ്ട് എന്നത് സത്യമാണ്. പക്ഷെ കഴിഞ്ഞ സർക്കാരുകൾ കൊല്ലങ്ങൾ കളഞ്ഞ അവസരത്തിൽ ഒരു സർക്കാരിന് കുറച്ചു ലിമിറ്റേഷൻ ഉണ്ട് എന്ന് പറയാതെ വയ്യ. ഒരു പരിധിക്കു അപ്പുറം മിലിറ്ററി ബജറ്റ് കൂട്ടാൻ പറ്റുന്ന സാഹചര്യത്തിൽ അല്ലല്ലോ നമ്മുടെ രാജ്യം. കഴിഞ്ഞ പത്തു കൊല്ലത്തെ ബാക്കി പത്രമാണ് ഇപ്പോൾ ചിലവാക്കേണ്ടി വരുന്നത് എന്നും ഇവിടെ ഓർക്കണം ]തെറ്റായ വിവരങ്ങളുടെ അടിസ്ഥാനത്തിൽ രാഷ്‌ടീയ മുതലെടുപ്പിന് വേണ്ടി ഒരു സർക്കാരിനെ കുറ്റം പറയാൻ ഒരു അവസരം എന്ന നിലയിൽ എഴുതിയ ഈ ലേഖനം തീരെ അനവസരത്തിൽ ആയി പോയി എന്ന് പറയാതെ വയ്യ.

    ഈ സർക്കാരിന്റെ മിലിട്ടറിയുടെ ആധുനിക വത്കരണത്തിനെ കുറിച്ച് ഉള്ള ഒരു ലേഖനം. [[https://www.dailypioneer.com/2018/columnists/steady-military-modernisation.html] ആധികാരികമായി കാര്യങ്ങൾ വായിച്ചു നോക്കി ലേഖനങ്ങൾ എഴുതിയാൽ അതിനു വിശ്വാസ്യത ഉണ്ടാവും. അല്ലെങ്കിൽ വെറും രാഷ്‌ടീയ കളിയായി ലേഖനങ്ങൾ മാറും എന്ന് ഓർക്കുക.

Use social login to comment

Leave a reply

Your email address will not be published. Required fields are marked *

*

Subscribe to our newsletter

jwalanam-mal-logo

About us | FAQ | Terms of use | Contact us

Copyright 2020. All Rights Reserved.| Designed & Developed by Midnay

Forgot your details?

Create Account